Me moton "Ne e mbajmë fjalën" mbrëmë në Strugë, Bashkimi Demokratik për Integrim e filloi fushatën zgjedhore me tubim parazgjedhor, në të cilin u prezantua kandidati i partisë për president të Republikës së Maqedonisë, Agron Buxhaku, si dhe kandidatët për kryetar komune dhe për këshilltarë të komunës.

Lideri i BDI-së, Ali Ahmeti tha se partinë e përbëjnë njerëz të cilët janë dëshmuar dhe të cilët dinë ta mbajnë fjalën e dhënë.

"Këtë e dëshmuam pas zgjedhjeve parlamentare 2006 kur nuk u respektua vullneti i popullit. Ne premtuan se do të respektohet vota juaj, se do të bëhemi zot të zërit të lirë të shqiptarëve. Atë e realizuam dhe tani pushteti u takon atyre që kanë legjitimitet nga populli", tha Ahmeti.

Ai theksoi se si parti do të bëjnë gjithçka që të mbahen zgjedhje të drejta dhe demokratike dhe theksoi se BDI nuk do t'i nënshtrohet provokimeve nga partitë tjera.

Kandidati për president , Buxhaku theksoi se BDI çdoherë i plotëson premtimet e veta. "Nëse e fitoj besimin e qytetarëve, së pari do të angazhohem që Maqedonia të fitojë liberalizim të vizave dhe do të përpiqem kompromisi për emrin të arrihet sa më parë, me çka do të realizohet dëshira e BDI-së dhe e të gjithë qytetarëve të Maqedonisë për t'u bërë anëtare e NATO-s dhe BE-së", tha Buxhaku.

Kryetari aktual i komunës së Strugës, Ramiz Merko, i cili për herë të dytë e kërkon besimin e qytetarëve, tha se nga qyteti dëshiron të bëjë qendër moderne turistike, e cila do të jetë tërheqëse për turistët e huaj gjatë tërë vitit.

"Gjatë katër viteve të kaluara kam bërë shumë, theksoi Merko, duke cekur se komuna e kthyer botxhin prej tre milionë euro dhe në projekte infrastrukturore, në kulturë, sport, arsim dhe sfera të tjera janë investuar 14 milionë euro.

Në tubim u prezantuan edhe kandidatët për këshilltarë nga dega e BDI-së në Strugë