Në kuadër të konferencës dyditore “Investimi në kohezionin social – investim në stabilitet dhe mirëqenie të shoqërisë”, që u mbajt në Moskë, në organizim të Këshillit të Evropës dhe Ministrisë së Shëndetësisë dhe Zhvillimit Social të Rusisë, ministri i Punës dhe Politikës Sociale, z-ri Xhelal Bajrami u takua me sekretarin e përgjithshëm të Këshillit të Evropës, Teri Dejvis, si dhe me kolegen e tij Tatjana Golikova, ministre e Shëndetësisë dhe Zhvillimit Social të Rusisë. Në këtë takim janë shkëmbyer përvojat pozitive dhe politikat në resorët që janë nën kompetencë të tyre, ndërsa është biseduar edhe për përforcimin e kohezionit social, si dhe për kapacitetin e shoqërive që të arrihet, mbahet dhe të ruhet mirëqenie e të gjithëve.

Në fakt, në Moskë në këto dy ditët e kaluara të Konferencës së Parë të ministrave për kohezionin social është ripërtëritur debati për rëndësinë e kohezionit social për shoqëritë evropiane në kontekst të globalizmit dhe krizës ekonomike. Po ashtu, në këtë konferencë është bërë fjalë edhe për nivelin e investimeve që nevojitet për t’u garantuar stabilitet social, i bazuar në qasje të barabartë të të gjithëve në mundësitë dhe të drejtat sociale.
 
Në këtë konferencë përpos delegacionit nga Republika e Maqedonisë, që udhëhiqet nga ministri i Punës dhe Politikës Sociale, z-ri Xhelal Bajrami, ishin të pranishme edhe delegacione të larta nga Shqipëria, Armenia, Austria, Azerbajxhani, Belgjika, Bosnja e Hercegovina, Bullgaria, Qiproja, Hungaria, Irlanda, Danimarka, Kroacia, Çekia, Estonia, Finlanda, Franca, Gjermania, Greqia, Mali i Zi, Malta, Letonia, Italia,  Holanda, Norvegjia, Polonia, Portugalia, Rumania, Federata Ruse, San Marino, Serbia, Sllovakia, Spanja, Suedia, Zvicra, Turqia, Ukraina, Britania e Madhe.  

Ministri i Punës dhe Politikës Sociale, z-ri Xhelal Bajrami me një pjesë të tyre ka realizuar takime bilaterale me të cilët ka shkëmbyer përvojat pozitive në sferën e politikës sociale.

Përpos delegacioneve shtetërore, në konferëncë kanë qenë të pranishëm edhe kryeministri i Rusisë, Vlladimir Putin, si dhe përfaqësues të Komitetit të Ministrave, kongresit të autoriteteve lokale dhe rajonale në kuadër të Këshillit të Evropës, Organizatës Ndërkombëtare të Punës dhe Komisari për të drejtat e njeriut.