Kryeministri i Republikës së Kosovës Hashim Thaçi dhe Kryetari i Bashkimit Demokratik për Integrim Ali Ahmeti pas takimit thanë për ALSAT se kanë biseduar për bashkëpunimin e Maqedonisë dhe Kosovës, zhvillimet në rajon ndërsa me theks të veçantë kanë biseduar edhe për zgjedhjet presidenciale dhe ato lokale që do të mbahen më 22 mars në Maqedoni.

"Biseduam edhe për zhvillimet në Kosovë e Maqedoni për të ardhmen e të dy vendeve tona, unë përgëzova z.Ahmetin për rolin udhëheqës dhe konstruktiv, natyrisht se tani Maqedonia është në prag të zgjedhjeve presidenciale dhe lokale dhe interesi i të gjithë njerëzve është që këto zgjedhje të jenë të lira , fer dhe demokratike për çka unë besoj se z.Ahmeti dhe gjithë lidershipi shqiptar në Maqedoni do të luajnë rolin e tyre aktiv. Unë nuk dua të flas vetëm për një etni por me rëndësi ëshët që zgjedhjet të jenë të lira, fer e demokratike, të respektuara, të pranuara nga i gjithë spektri politik, për çka unë besoj plotësisht në angazhimet dhe përkushtimet e z.Ahmeti dhe të tjerëve.", deklaroi kryeministri Hashim Thaçi.

Kryetari i BDI-së, Ali Ahmeti, tha se e kishte siguruar kryeministrin Thaçi se partia e tij angazhohet maksimalisht që zgjedhjet e pranverës në Maqedonim të jenë të lira, fer dhe demorkatike pa i frikësuar njerëzit, të gjithë njerëzit të demonstrojnë vullnetin e tyre të lirë.

"Gjithashtu e njoftova z.Thaçi për takimet, kontaktet që mbaj unë edhe me partitë opozitare në vend sa i takon partive shqiptare. Ne jemi të interesuar të përshpejtohet vendosja e marrëdhënieve diplomatike mes Maqedonisë dhe Kosovës, do të ishte në të mirë të dy vendeve, procesi nuk duhet të jetë shumë i largët dhe në një të ardhme të afërt do të vendosen marrëdhënie diplomatike.", theksoi Ahmeti.

Ahmeti tha për ALSAT tha se  në zgjedhjet e 22 marsit do të bashkëpunojë me partnerin e koalicionit VMRO-DPMNE-në.

"BDI-ja aty ku ka interesa do të ofrojë bashkëpunim me partitë tjera në këtë rast me partnerin e koalicionit VMRO-DPMNE-në dhe ndihma mund të jetë reciproke në këtë drejtim", shtoi ai.

Kryeminsitri i Kosovës Hashim Thaçi duke folur për punën e institucioneve të Kosovës në prag të shënmimit të 1 vjetorit të pavarësisë tha se 2008-ta për Kosovën ishte vit historik ndërsa 2009 do të jetë vit i vazhdimit të suksesit dhe hapjes së perspektivës të sigurtë të Kosovës për integrim në strukturat e BE-së dhe NATO-s.